Mbaara Ni Nene Ndi Rugendo-Ini Lyrics

Mbaara nĩ nene ndĩ rũgendo-inĩ,
nĩ ndĩhokete Ngai wakwa,
Njĩrĩgĩrĩire mũthenya mwerũ,
Wa Kũhurũkio kwa arĩa atheru,
Ngakena mũno gĩkeno kĩingĩ,
Ndoima mwĩrĩ-inĩ hotanĩte,
Ndamenya wega mbaara cia mwĩrĩ,
Na ndeto cia andũ nĩ ciathira.

Rũgendo rũrũ ndirĩ na mwago,
Kana ũhuroko ndĩ mbaara-inĩ,
Naniĩ nĩnjũĩ mwĩhoko wakwa,
Gĩkeno gĩakwa nĩ Mwathani,
Mathĩna mothe na mbaara ciothe,
Nĩnjũĩ wega ndahootana,
Mũthenya wakwa wa kũhurũka,
Ndigacoka kũririkana.

Shaitani nĩoĩ kĩrĩa wĩna kĩo,
Ngoro-inĩ yaku nĩ ũhonokio,
Ndũkanerigwo wona werigwo,
Hingo ya igai nĩ ũkarĩra,
Mũthenya mwerũ ũcio twetereire,
Jesũ agĩcoka na ũthamaki,
Ena Kĩhooto na ũnene wa Ithe,
Ndũrĩrĩ ciothe nĩ ikarĩra.

Nĩ tũgakinya harĩa hatheru,
Gacũmbĩrĩ-inĩ ga kĩrĩma,
Mũciĩ mũthaka wa ngwatanĩro,
Na wendo mũingĩ kũu igũrũ,
Mwĩrorerei maũũgĩ ma andũ,
Nĩ merekeire gũcirithio,
Rũgama wega ngwatanĩro-inĩ,
Nĩ ũkahootana he Mwathani.

Ndũrĩrĩ ikona ũtheru wa andũ,
Arĩa mahootanĩte rũgendo-inĩ,
Marũgamĩte na nguo njerũ,
Na thũmbĩ ciao cia ũthamaki,
Magĩtua ciira hamwe na Jesũ,
Gĩtĩ-inĩ gĩake gĩa ũthamaki,
Hĩndĩ ĩyo nake Roho Mũtheru,
Nĩrĩo akegooca na ũhonokio.

Nĩ akoiga andũ arĩa mahootanĩte,
Maikarĩre itĩ cia ũthamaki,
Nao Araika marigicĩirie,
Makĩhuhaga mĩtũrirũ,
Na tũrumbeta na inanda nyingĩ,
Magĩkenera Mũthamaki,
Mbere ya gĩtĩ gĩa ũthamaki ũcio,
Ndũrĩrĩ ciothe nĩ ikarĩra.