Murangiri - Paul Mwai

Ndoka harĩ wee…Jesũ

Wee tu nowe ngoro yakwa,
Ebenezar ĩcũthĩrĩirie,
Ũhingĩrie irĩkanĩro,
na merirĩria ma ngoro ino:
Nĩguo ndikanehoke,
Arĩa magũthũire,
Arĩa magũcambithagia,
Nyone irio cia mwĩrĩ ũyũ

Wee mũrangĩri,
Rangĩra ngoro yakwa:
Tondũ arangĩri,
Marutaga owa tũhũ;
Wee mwaki wa nyũmba,
Ndakũhoya njakĩra ĩno:
Tondũ cia kwĩyakĩra,
No irĩmomoka.

Ndikũĩyakĩra rĩngĩ,
Nĩndakinya mũico:
Gĩkĩ gĩthima ndoiga,
Ndikwĩyenjera rĩngĩ;
Wee mũthundũri wa ithima,
Werũinĩ nyenjera gĩaku,
Tondũ ciakwĩyenjera,
Irutaga maĩ marũrũ.

Kĩheo gĩkĩ Mwathani,
Reke gĩtuĩke gĩaku:
Mũgambo ũyũ Elohimu,
Ngũrutĩre ta igongona;
Ndikanekore itindoinĩ,
Cia Afiristi ngĩmakenia;
Nakũmathĩĩra ngano,
Nĩguo mandĩhĩre nyũmba.

Nĩndakũhoya Ngai,
Gitĩra ngoro yakwa:
Nĩguo ndikanarũmwo,
Nĩ nyoka cia werũ ũyũ:
Ndigathekwo nĩ thũ ciakwa,
Na arĩa mendaga thire:
Njage muoyo ndiganĩre,
Njoke ndegwo nĩwe mũnyũmbi;

Rĩu ota Danieli,
Ndoiga ndigwĩtukania:
Ici nyama ndikũrĩa,
Oona cianora:
Ndatũũra ndĩaga mboga,
Nanĩnjũĩ nĩngũtũũra;
Ikeno ici na mĩago ĩno,
Kaba eikare ũnjigane.